إعادة تعريف النجاح

قررت أغيّر مساري المهني. 
​

أنا أمنية حمدي، أعمل كخدمة عملاء في منصة "ممكن لها" — وهي منصة مخصصة لدعم وتمكين السيدات. 

المنصة بتساعد النساء على تطوير المهارات اللازمة للعودة لسوق العمل، سواء من خلال تدريبات عملية أو جلسات إرشاد مهني بتقدّمها المنصة. أنا حاصلة على بكالوريوس في العلوم والتربية، واشتغلت في مجال التدريس لأكتر من 13 سنة. 

بعد كده، قررت أغير مساري المهني تمامًا، وده كان قرار مليان تحديات لأني كنت هبدأ من الصفر. لكن ده ماخلنيش أتردد، بالعكس، كان عندي ثقة في نفسي وفي ربنا إني أقدر أبدأ في مجال جديد. وكمان قررت أكمل دراسات عليا جنب الشغل، والحمد لله قدرت أحقق ده، بفضل ربنا وبفضل بيئة العمل الداعمة اللي بتشجعك دايمًا تكوني نسخة أفضل من نفسك. 

بصراحة، فكرة المنصة ألهمتني جدًا من أول ما بدأت أشتغل فيها. حسّيت بفخر حقيقي إن في جهة فعلاً مهتمة بالستات اللي محتاجة دعم علشان تطوّر نفسها وترجع تكمل طريقها المهني. علشان كده، بقولها من قلبي: ما تقلقيش أبدًا من فكرة تحقيق حلمك في أي وقت، مهما كان عمرك. السن عمره ما كان عائق. الأهم إنك تبدأي دلوقتي، وتكوني دايمًا واثقة في ربنا.